Nag-init ang girinaway sa Senado matapos hamonon ni Senador Francis “Kiko” Pangilinan si Senador Robin Padilla may kaangtanan sa plano sini nga magsampa sang ethics complaint batok sa iya.
Sa iya pahayag sang Martes sang gab-i, ginsiling ni Pangilinan nga kulang sang legal nga basihan ang reklamo nga ginaplano ni Padilla kag ginlaygayan niya ini nga indi mag-“balat sibuyas.”
Suno kay Pangilinan, madugay na siya sa Senado kag madamo na sang mainit nga diskusyon, sigawan kag pagsaka sang tingog ang iya naeksperyensyahan, apang subong lang siya nakakita sang posible nga ethics complaint bangud sini.
Ginpat-od man niya nga normal lamang ang mabaskog nga diskusyon kag pagtaas sang tingog sa tunga sang mainit nga debate sa plenaryo, kag kun konsiderahon ini nga paglapas sa ethics, madamo na kuntani nga mga senador ang napasakaan sang kaso kag naparusahan.
Nagpaandam man si Pangilinan nga kun padayonon ni Padilla ang reklamo, magsampa man siya sang kontra-reklamo batok diri bangud sang gin-alegar nga paglapas sa parliamentary rules, kakulangan sang proper decorum, kag ginatawag niya nga panakot ukon harassment samtang naka-recess ang plenary session.
“Indi ako magpasugot sa pam-bu-bully kag pa siga-siga,” pahayag ni Pangilinan, samtang ginpasiguro man niya nga bisan indi siya palaaway, indi man siya magpalikaw kun padayunon ang kaso.
Nagsugod ang tensyon sang duha ka senador matapos ang diskusyon sa Senado parte sa gin-alegar nga harassment kag human rights violations nga ginahimo sang mga tauhan sang National Bureau of Investigation sa ila pagtinguha nga maserbisyuhan sang arrest warrant si Senador Ronald “Bato” dela Rosa sang nagligad nga Lunes sang gab-i.
