Ginpasiguro sang Armed Forces of the Philippines (AFP) nga bahin lang sang ila standard security operations ang pag-deploy sang mga Marines sa Senado kag wala ini sang labot sa bisan ano nga bag-o nga insidente.
Suno kay AFP spokesperson Col. Francel Margareth Padilla, ang mga tropa regular nga naka-assign agud maghatag sang perimeter security sa iban-iban nga institusyon bilang kabahin sang dugay na nga protocol.
Ginpahayag niya nga may ara man sang nakatalagang tauhan sa mga importante nga building sang gobyerno pareho sang Malacañang Palace kag bisan sa Rizal Monument.
Ang amo nga praktis pila ka tuig na nga ginapatuman bilang kabahin sang responsibilidad sang mga sundalo para sa seguridad.
Ginhimo ini nga pahayag sang opisyal sang AFP samtang may mga pamangkot kag nagalapta nga balita nga nag-augnay sa deployment sa posible nga pag-aresto kay Senador Ronald “Bato” dela Rosa tungod sa kaso sa International Criminal Court (ICC).
Ginpasiguro man sang AFP nga ang papel sang mga Marines amo lang ang perimeter security, kag indi sila naga-sulod sa sulod sang building sang Senado ukon Palasyo.
Bisan pa sini, posible gihapon nga magbago ang deployment depende sa sitwasyon kon kinahanglanon ang ila bulig.
