Ginkumpirma ni Department of Trade and Industry (DTI) Undersecretary Ceferino Rodolfo nga ginakabig nga Micro, Small and Medium Enterprise (MSME) ang Cale88 Foods Corporation nga ginadugtong kay Atty. Manases Carpio, bana ni Vice President Sara Duterte.
Sa ika-45 nga adlaw sang impeachment trial, ginpaathag ni Rodolfo nga nahulog sa kategorya sang MSME ang kompanya bangod wala nagalab-ot sa P15 milyones ang project cost sini.
Ginpahayag man niya nga gin-aprubahan sang Board of Investments (BOI) Extension Office sa Davao ang aplikasyon sang Cale88 para sa Certificate of Registration of an Export Enterprise.
Suno kay Rodolfo, wala siya nakakita sang bisan ano nga pagsupak sa aplikasyon sa evaluation report. Wala man ginakinahanglan nga ipanugyan sa mga pamantalaan ang sertipiko bangod ginapaskil lamang sang BOI sa ila website ang pahibalo nahanungod sa rehistrasyon sang MSME.
Samtang, ginpahayag sang abogado sang depensa nga si Justin Gular nga nagasupak ang testimonya ni Rodolfo sa nauna nga findings sang prosecution witness nga si Alex Cabrera, nga nagapamangkot kon nagapadayon gid bala ang negosyo sang Cale88.
Madumduman nga gin-angkon ni Cabrera nga may yara sang wala maathag nga manggad nga nagabalor sa P817 milyones tubtob P1.5 bilyones ang mag-asawa nga Duterte-Carpio, nga wala nalakip sa ila joint Statement of Assets, Liabilities and Net Worth ukon SALN. Lakip sa iya gin-usisa ang kita nga ginadugtong sa Cale88.













