-- ADVERTISEMENT --

Ginkabig sang House prosecution panel nga diversionary tactic lamang ang pagpalapnag sang kampo ni Vice President Sara Duterte sang alegasyon nahanungod sa ginapahayag nga no-election scenario sa 2028.

Ginhangkat ni House impeachment prosecutor kag Manila Representative Joel Chua si Atty. Paolo Panelo Jr., tagpamaba sang bise presidente, nga magpresentar sang ebidensya agud mapamatud-an ang iya alegasyon sa baylo nga magpalapnag sang mga isyu nga wala sang kaangtanan sa impeachment trial.

Suno kay Chua, mas maayo nga magpokus ang defense team sa pagsabat sa mga alegasyon batok kay Duterte, ilabi na sa mga ebidensya nga ginpresentar sang prosekusyon.

Ginsuportahan man ini ni House prosecution spokesperson kag Lanao del Sur Representative Zia Alonto Adiong, nga nagduhaduha sa tiyempo sang pagpagwa sang amo nga alegasyon, samtang nagapadayon ang pagtalakay sa mga pinansyal nga ebidensya batok sa bise presidente.

Dugang pa ni Adiong, posible nga ginahimo ini agud malikaw ang atensyon sang publiko halin sa impeachment proceedings, ilabi na bangud suno sa iya, wala pa makapresentar ang depensa sang testigo nga makapamalibad sa mga ebidensya sang prosekusyon.

Sa karon, nagapabilin nga ginapanginwala sang kampo ni Duterte ang alegasyon nga may yara ini sang P817.87 milyones nga unexplained wealth kag ginadumilian nga pag-apil sa negosyo halin 2022 tubtob 2025, nga kabahin sang nabilin nga impeachment charge sa idalom sang Article II.