-- ADVERTISEMENT --

Ginkumpirma ni Department of Trade and Industry (DTI) Undersecretary Ceferino Perry Rodolfo sa impeachment trial nga nalista si Atty. Manases Carpio, bana ni Vice President Sara Duterte, bilang presidente sang Cale88 Foods Corporation sa General Information Sheet (GIS) sang kompanya sang 2024.

Suno kay Rodolfo, tag-47.5 porsyento nga bahin sang pagpanag-iya ang yara kanday Carpio kag Dr. Lourdes Lebosada sa amo nga tuig.

Apang, sa 2025 GIS, nagbag-o ang listahan sang mga tag-iya, nga nagalakip na kanday Lolita Paimalan nga may lima ka porsyento kag Pikimong Pikimong Philippines Corporation nga may 95 porsyento nga bahin.

Ginpaathag ni Rodolfo nga katungdanan sang Board of Investments (BOI) nga bantayan ang matuod nga mga tag-iya sang mga kompanya nga rehistrado sa ila ahensiya kag masiguro nga naitala sing husto ang mga pagbag-o sa pagpanag-iya.

Samtang, ginapakita sang mga rekord nga bisan P125,000 lamang ang ginapahayag nga nabayran nga puhunan sang Cale88, naglab-ot sa P776 milyones ang kabug-usan nga pagsulod sang kuwarta kag P154 milyones ang nagguwa, samtang P23 milyones ang ginreport nga balor sang baligya.

Nauna naman nga ginpahayag sang Anti-Money Laundering Council (AMLC) nga nakabaton ang kompanya sang P319.32 milyones nga mga padala halin sa China kag Hong Kong.