-- ADVERTISEMENT --

Ginkumpirma sang testigo sang depensa ni Vice President Sara Duterte nga ang ngalan sang CALE88 Foods Corporation naghalin sa apelyido sang mga tag-iya sini nga sanday Atty. Manases Carpio kag Lourdes Lebosada.

Sa ika-45 nga adlaw sang impeachment trial, ginpaathag ni Department of Trade and Industry (DTI) Undersecretary Ceferino Rodolfo nga ang “CA” nagarepresentar sa Carpio, “LE” sa Lebosada, samtang ang “88” nagasimbolo sa infinity ukon wala sing katapusan kag ginakabig man nga palatandaan sang swerte.

Ang CALE88 isa ka kompanya nga nagahimo sang banana chips kag nalakip sa SALN ni Duterte, nga tag-47.5 porsyento ang shares of ownership nanday Carpio kag Lebosada.

Madumduman nga gin-usisa ni anay Senador Antonio Trillanes IV ang operasyon sang kompanya, lakip ang manubo nga bayranan sa kuryente, gamay nga puhunan, kag kakulang sang regular nga mga empleyado bisan nagahimo ini sang banana chips.

Ginpahayag man ni Trillanes ang kapin P319 milyones nga kuwarta nga ginpadala sa kompanya halin sa China, nga ginpalig-on sang Anti-Money Laundering Council (AMLC).

Apang sa cross-examination, ginpahayag ni Rodolfo nga wala sang dokumento nga nagapamatuod sang kaangtanan sang gobyerno sang China sa CALE88.