-- ADVERTISEMENT --

Nagnubo sa $98 bilyones ang gross international reserves (GIR) sang Pilipinas sa katapusan sang Oktubre, samtang nagrekord man sang $1.5 bilyones nga depisit ang balanse sang pagbayad sang pungsod ukon Balance of Payments (BOP), suno sa Bangko Sentral ng Pilipinas (BSP).

Ginpatungod sang BSP ang pagnubo sang reserba sa pagbaligya sang foreign currencies, pagnubo sang balor sang bulawan sa pangkalibutanon nga merkado kag pagkuha sang gobyerno sang foreign currencies agud magbayad sang mga utang kag iban pa nga galastuhon.

Bisan pa sini, ginpasalig sang BSP nga bastante gihapon ang reserba sang pungsod nga makasuporta sa 6.1 ka bulan nga panginahanglanon sa importasyon kag makabayad sang mga obligasyon sa utang sa guwa sang pungsod.

Samtang, nagsaka sa $10.6 bilyones ang kabug-usan nga depisit sang BOP halin Enero tubtob Oktubre 2024, mas mataas kon ipaanggid sa $4.6 bilyones nga depisit sa amo man nga panahon sang nagligad nga tuig.

Ginpaathag sang BSP nga naghalin ini sa mas mataas nga depisit sa negosyo sang mga balaklon kag pagguwa sang pondo sang mga langyaw nga mamumuhunan.

Apang, nakabulig nga mapunggan ang mas daku nga depisit ang padayon nga pagpadala sang kuwarta sang mga Pilipino sa iban nga pungsod, pangutang sang gobyerno sa guwa, pagbaligya sang mga serbisyo kag pagsulod sang foreign direct investments.