Apat na ka tuig na nga aktibo nga nagadonar sang dugo ang 20-anyos nga nursing student nga si Jazzel Mae Dequilmo, bilang paagi sang pagbulig kag pagluwas sang kabuhi sang mga tawo nga nagakinahanglan sang dugo.
Sa interview sang Bombo Radyo Koronadal, ginpaambit ni Dequilmo nga nagsugod siya sa pagdonar sang dugo sang menor de edad pa lamang siya. Sa amo nga tion, kinahanglan pa niya magkuha sang pagtugot halin sa iya mga ginikanan antes makapakigbahin sa blood donation activity.
Subong nga 20-anyos na siya, padayon gihapon ang iya pagdonar sang dugo bangud daku ang iya pagtuo nga paagi sini, mahimo siya makabulig sa mga pasyente nga nagakinahanglan sang blood transfusion.
Suno kay Dequilmo, isa sa iya mga rason sa pagdonar sang dugo amo ang handum nga mangin kabahin sa pagluwas sang kabuhi sang iban, bangud ang isa ka donasyon mahimo mangin daku nga bulig sa tawo nga nagakinahanglan sini.
Bangud sini, gin-awhag niya ang publiko nga magpakigbahin man sa mga bloodletting activity kag magdonar sang dugo agud makabulig sa mga nagakinahanglan.
