Ginpasiguro liwat ni Senator-Judge Ping Lacson nga may awtoridad ang impeachment court nga magpataw sang contempt batok sa bisan sin-o nga indi magsunod sa mga patakaran sini.
Ini kasunod sang iya pagpamuna sa pamatasan sang una nga testigo sang depensa sa nagligad nga pagdinig sang impeachment trial batok kay Vice President Sara Duterte.
Bisan wala direkta nga ginhingadlan ni Lacson ang testigo, ginapatihan nga nagapatuhoy ang iya pahayag kay Davao City Assessor Engineer Jaime Adalin, nga amo ang una nga ginpresentar sang kampo sang depensa.
Madumduman nga gin-usisa si Adalin sang mga senador parte sa iya ginalegar nga pagbiyahe sa China sang 2025, nga suno sa mga alegasyon, isa ka all-expense-paid trip nga gin-sponsor sang Chinese Consulate.
