Ginapanawagan ni Koronadal City Mayor Erlinda Araquil sa Department of Public Works and Highways (DPWH) nga unahon ang mga flood-prone areas sa siyudad sa pagpatuman sang master drainage plan, partikular na ang downtown area.
Ini kasunod sang pagbaha sa pila ka lugar matapos ang mabaskog nga pag-ulan, lakip ang Gensan Drive, Arellano Street kag atubangan sang public market.
Sa interview sang Bombo Radyo Koronadal ginpahayag ni Araquil, nga nagapadayon ang pagpondo sang lokal nga gobyerno para sa drainage projects, apang nagapabilin gihapon ang problema sa pagbaha apesar may milyon-milyon na nga nagasto kada tuig.
Ginpahayag sang alkalde nga lima ka drainage channels ang kinahanglan konektahon ang ila mga outlet agud masiguro ang husto nga pag-ilig sang tubig pakadto sa drainage exits.
Sa pagsinapol kaupod ang DPWH, natalakay ang kinahanglanon nga pondo nga ginabanta nagalabaw sa ₱1 bilyon agud makumpleto ang drainage system.
Gindugang ni Araquil nga kinahanglan tutukan man ang wala pa makonektar nga drainage outlets kag ang epekto sang nagapadayon nga road construction sa pila ka lugar.
