Ginakabig ni Retired Judge Lorenzo Balo nga “very deserving” si Chief Justice Rodil V. Zalameda bilang ika-28 nga Chief Justice sang Korte Suprema matapos ini ginpili ni President Ferdinand Marcos Jr. kag pormal nga nagpanumpa sang Biyernes, Nobyembre 6, 2026, sa Supreme Court En Banc Session Hall.
Sa interview sang Bombo Radyo Koronadal kay Ret. Judge Balo, nga amo ang Provincial Legal Adviser sang Sultan Kudarat, iya ginpahayag ang kalipay kag pagsuporta sa pagpili kay Zalameda bilang bag-o nga mangin pinakamataas nga opisyal sang hudikatura sa pungsod.
Suno kay Ret. Judge Balo, ang malapad nga eksperyensya kag nagkalain-lain nga posisyon nga naagyan ni Zalameda sa sulod sang hudikatura nagapakita sang iya kapasidad kag kwalipikasyon agud pangunahan ang Korte Suprema.
Ginakabig man niya nga importante nga basehan ang mga nahimo kag kontribusyon ni Zalameda sa iya pagserbisyo sa hudikatura.
Sa pihak sini, ginpahayag ni Ret. Judge Balo nga dapat hatagan sang tion kag oportunidad si Chief Justice Zalameda agud mapamatud-an ang iya kaugalingon sa iya bag-o nga katungdanan.
Ini kasunod sang nagaluntad nga mga pagduhaduha kag kritisismo sang pila ka sektor sang publiko nga nagakwestyon sa iya pagkatalaga, lakip na ang mga alegasyon nga may kaangtanan ang iya pagpili sa nangin desisyon sang Korte Suprema sa kaso sang iloy sang Presidente nga si Imelda Marcos.
Apang ginpahayag ni Ret. Judge Balo nga kinahanglan nga hatagan anay sang oportunidad si Zalameda nga ipakita ang iya independensya kag abilidad sa pagdumala sang Korte Suprema, sa baylo nga husgahan dayon ang iya kapasidad bangud lamang sa mga kontrobersiya nga nagalibot sa iya pagka-appoint.
