Nagpahayag ng kahandaang makipagtulungan sa Democratic Party si United States President Donald Trump sakaling makuha ng partido ang kontrol sa Kongreso kasunod ng midterm elections sa Amerika.
Tiniyak ni Trump na igagalang niya ang magiging resulta ng halalan, kabilang ang posibilidad na mawalan ng kontrol ang Republican Party sa isa o parehong kapulungan ng Kongreso.
“I am absolutely willing to accept those results,” pahayag ng pangulo.
Sinabi rin niyang umaasa siyang makakahanap ng paraan ang kanyang administrasyon upang makipagtulungan sa mga Democrat anuman ang maging resulta ng botohan.
“We’ll work with the Democrats, and we’ll, you know, look forward to working with them. We’ll probably work something out,” dagdag ni Trump.
Isinasagawa ang midterm elections sa kalagitnaan ng apat na taong termino ng isang US president upang pumili ng mga bagong miyembro ng Kongreso at iba pang opisyal ng pamahalaan.
Gayunman, taliwas ito sa nauna niyang pahayag bago ang halalan, nang sabihin niyang kikilalanin lamang niya ang resulta kung magiging “honest” ang proseso ng pagboto.
Nananatiling mahalaga ang resulta ng midterm elections dahil matutukoy nito kung mananatili sa Republicans o mapupunta sa Democrats ang kontrol sa dalawang kapulungan ng Kongreso, na maaari ring makaapekto sa pagsusulong ng mga panukala ng administrasyong Trump.
