Nagapangatubang sang pagnubo sang pasahero kag kita ang pila ka tricycle driver nga nagapamasada halin sa Lutayan, Sultan Kudarat, kasunod sang pagbalhin sang ila terminal sa Chinatown sa syudad sang Koronadal.
Sa interview sang Bombo Radyo Koronadal ginpahayag ni JC Nosis, isa ka tricycle driver sa Lutayan, Sultan Kudarat nga naghinay ang ila pagpangabudlay bangud malayo na ang ila bag-o nga pwesto kon ipaanggid sa ila anay terminal sa likod sang public market sa Rizal Street.
Suno kay Nosis, antes ang pagbalhin, mas madamo ang ila pasahero bangud mas mahapos sila makita kag mas accessible sa mga nagakinahanglan sang transportasyon.
Karon, nagapahayag siya nga nagamay ang ila kita bangud nagamay man ang nagasakay sa ila mga tricycle.
Ginpahayag man sini nga wala sila sang may nabaton nga klaro nga komunikasyon halin sa City Government parte sa pagbalhin, kag ang mga traffic personnel lamang ang nagpaathag kag naggiya sa ila kon diin sila dapat magpwesto.
Dugang pa ni Nosis, may mga pasahero nga nagabayad sang mas mataas nga plete, nga nagaabot sa P30, P40 tubtob P50, samtang P20 ang naandan nga sukot kon halin sa downtown area.
Bangud sini, nagapanawagan si Nosis kay Mayor Erlinda Araquil nga konsiderahon ang ila kahimtangan kag tugutan sila nga makabalik sa ila anay terminal agud mabalik man ang mas madamo nga pasahero kag masustentuhan ang ila pang-adlaw-adlaw nga pangabuhi.
