Liwat nga ginpahayag sang Commission on Elections (Comelec) nga indi pwede gamiton bilang dokumento para sa voter registration ang barangay certificate of residency kag community tax certificate (cedula).
Suno kay Comelec Chair George Erwin Garcia, may mga report nga nabaton ang komisyon nga may pila ka mga barangay officials nga nagahatag sang certificate of residency sa mga indibidwal nga indi aktuwal nga nagaistar sa sulod sang ila nasakupan.
Bangud sini, ginpanugyan ni Garcia ang mga aplikante nga maggamit sang iban pa nga acceptable nga mga dokumento agud ma-verify ang ila identity kag lugar nga gina-istaran.
Ang mga ginabaton nga mga dokumento sa pagkilala nagalakip sang pasaporte, clearance sang pulis, National ID, postal ID, lisensya sa pagmaneho, kag clearance halin sa National Bureau of Investigation (NBI).
Ang mga aplikante mahimo man magsumiter sang library card, student ID, ukon senior citizen’s ID, basta ang ngalan, litrato, kag address sang aplikante maathag nga nasulat sa dokumento.
Tinutuyo sini nga tikang nga mapasiguro ang nagakaigo nga verification sang identity kag residency sang mga nagaparehistro bilang botante.
