Nagpahayag sang suporta si Koronadal City Vice Mayor Ester Marin-Catorce sa palaabuton nga Dugong Bombo 2026 nga ipahigayon sa Sabado, Nobyembre 14, 2026, agud makabulig sa mga tawo nga nagakinahanglan sang dugang nga suplay sang dugo.
Sa interview sang Bombo Radyo Koronadal, ginpabug-atan ni Vice Mayor Catorce ang importansya sang bloodletting activity bilang isa ka inisyatibo nga nagahatag sang oportunidad sa publiko nga makabulig sa pagluwas sang kabuhi sang iban.
Suno sa iya, dako ang papel sang blood donation bangud ang dugo kinahanglanon sa nagkalain-lain nga medikal nga sitwasyon, lakip na sa mga pasyente nga nagakinahanglan sang blood transfusion bangud sang aksidente, operasyon kag iban pa nga balatian.
Paagi sa Dugong Bombo 2026, ginapaabot nga madugangan ang suplay sang dugo nga mahimo magamit sang mga nagakinahanglan sini.
Bangud sini, gin-awhag ni Catorce ang publiko nga magpartisipar sa aktibidad kag maghatag sang boluntaryo nga donasyon sang dugo, bangud ang isa ka donasyon mahimo mangin dako nga bulig kag makaluwas sang kabuhi sang iban nga tawo.
