Nagapanawagan sang paghangop kag kooperasyon si Koronadal City Mayor Erlinda Araquil sa mga pumuluyo samtang ginapadayon sang lokal nga gobyerno ang mga tikang para sa pagtinlo, paghan-ay kag pag-organisar sang syudad.
Sa interview sang Bombo Radyo Koronadal, ginpahayag sang alkalde nga kabahin sang iya prayoridad ang kaayuhan sang mga pumuluyo, ilabi na ang mga imol kag nagapangabuhi sa adlaw-adlaw.
Apang ginpaathag niya nga kinahanglan man ipatuman ang mga tikang agud mas mangin organisado, matinlo kag may disiplina ang palibot sang syudad.
Ginpabutyag man ni Araquil nga wala ginapabay-an sang lokal nga gobyerno ang mga vendors nga naapektuhan sang pagbalhin sang ila mga pwesto, bangud nagapadayon ang paghatag sang interbensyon kag bulig sa ila.
Bangud sini, nagapangayo ang alkalde sang paghangop sang publiko kag nagapanawagan nga magkooperar kag magsunod sa mga pagsulundan kag proyekto sang lokal nga gobyerno para sa kaayuhan sang Koronadal City.
