Ginapreparar na sang lokal nga panguluhan sang Koronadal City ang pagpatukod sang National Museum branch sa lugar sang Old City Hall, nga mangin sentro sang pagpreserbar kag pagpromotar sang kultura kag mga tela sang South Central Mindanao.
Sa interview sang Bombo Radyo Koronadal ginpahayag ni City Councilor Chow Rodriguez nga napresentar na sang National Museum ang initial design sang pagatukuron nga museo, samtang ginahulat na lamang ang final nga disenyo sang proyekto.
Suno sa konsehal, isa sa mga rason nga ginapadali ang pag-relocate sang mga night market vendors amo ang preparasyon sa Old City Hall, nga base sa usufruct agreement, ginpahanugutan sang city government nga magamit sang National Museum sa sulod sang lima ka tuig bilang branch sini sa Syudad sang Koronadal.
Ginpahayag man ni Rodriguez nga magatutok ang museo sa mga textile ukon tela, partikular ang mga woven products sang Koronadal kag sang nagkalain-lain nga kabanwahanan kag probinsya sa Region 12.
Dugang pa niya, ginakonsiderar nga mapabilin ang orihinal nga estruktura kag disenyo sang Old City Hall bangod sang historical significance sini, gani limitado lamang sa mga kinahanglanon nga enhancement ang pagahimuon.
Ginpahayag man sang konsehal nga mangin interactive ang museo kag mahimo nga atraksyon para sa mga estudyante, artists kag mga mahilig sa arts and crafts. Nagbenchmark na man ang City Tourism and Cultural Affairs Office sa isa ka museum sa Davao City agud makakuha sang ideya sa pagdumala kag pagpalambo sang proyekto.
Samtang, bukas man ang lokal nga panguluhan sa paggamit sang artificial intelligence kag iban pa nga modernong teknolohiya sa pagpromotar sang turismo, lakip na ang aplikasyon nga ginhimo sang isa ka graduate student sang Notre Dame of Marbel University nga nagapakita kag nagapromotar sang lokal nga kultura.
Ginapaabot nga indi lamang dugang nga tourist attraction ang museo kundi makahatag man sang bag-o nga oportunidad sa trabaho para sa mga mangin empleyado kag magadumala sini.
