Magalunsar ang Kamara sang mga Representante sang online transparency portal nga magatugot sa publiko nga masubay ang mga proyekto sang gobyerno, lakip ang gin-alokar nga pondo kag kahimtangan sang pagpatuman sini.
Suno kay House Speaker Faustino “Bojie” Dy III, ginalauman nga ma-access na sang publiko ang portal sa masunod nga mga adlaw matapos sugdan ang paghimo sini sang Septyembre.
Kadungan sini, ginmanduan ni Dy ang mga komite sang Kamara nga usisaon ang paggamit sang mga ahensya sang gobyerno sa pondo nga gin-alokar sa 2026 national budget, agud masiguro nga nagakabagay ini sa gintuyo nga mga programa kag proyekto.
Ginpahayag man niya nga bukas sa publiko kag ipalantala paagi sa livestream ang mga pagtililipon sang bicameral conference committee parte sa 2027 national budget.
Samtang, padayon nga gin-usisa sang Kamara ang mga pagbag-o sa badyet, ilabi na ang dugang nga pondo para sa edukasyon, bulig medikal kag agrikultura bilang pagpanghanda sa ginapaabot nga El Niño.
Ginpabutyag ni Dy nga kinamatarong sang publiko nga mahibaluan kon paano ginagamit ang ila ginabayad nga buwis kag responsibilidad sang Kongreso nga masiguro ang husto nga paggamit sang pondo sang gobyerno.
