Nagapakita sang suporta ang mayorya sang Senado sa paninguha nga limpyuhan ang ginaproponer 2027 national budget halin sa mga alokasyon nga wala sang klaro nga basihan kag posible nga mangin dalan sang korupsiyon.
Suno kay Senador Panfilo “Ping” Lacson, nagahugpong ang mga senador sa pag-usisa sang tagsa ka bahin sang ginaproponer nga budget agud masiguro nga wala sing kuwestiyonable nga proyekto ukon paggasto nga makalusot sa pagrepaso.
Ginpahayag niya nga kabahin sa sini nga tikang ang paninguha ni Senate Finance Committee Chairperson JV Ejercito nga makakas g ang mga alokasyon nga wala nagakaigo nga pagpamatarong.
Dugang pa ni Lacson, indi lamang pagtangtang sang mga makaduluda nga pondo ang ginatuyo sang Senado, kundi pati ang pagpasanyog sang transparency kag accountability sa proseso sang pagbahin-bahin sang pondo sang gobyerno.
Ginpabug-atan man sang senador nga dapat wala sang pinilian sa pag-usisa sang mga alokasyon, bisan pa kon sin-o ang nagpasulod ukon makabenepisyo sa amo nga mga proyekto.
Nahibaluan nga mangin isa sa mga sentro nga talakayan sang Senado ang pagrepaso sa bersyon sang 2027 budget nga gin-aprobahan sang House of Representatives, ilabi na ang mga proyekto nga ginakuwestiyon bangud sa kakulang sang klaro nga rason kag posible nga koneksyon sa mga personalidad nga malapit sa administrasyon.
