Ginpanawagan ni City Councilor John Rey “Chow” Rodriguez ang publiko nga magboluntaryo sa pagdonar sang dugo agud makabulig sa nagapadayon nga panginahanglan sang blood supply sang mga pasyente nga nagakinahanglan sang transfusion.
Sa interview sang Bombo Radyo Koronadal, ginpahayag ni Rodriguez, nga ang boluntaryo nga pagdonar sang dugo isa ka paagi sang pagluwas sang kabuhi kag pagpakita sang volunteerism kag social responsibility.
Ginpunto niya nga may mga pasyente nga nabutang sa peligro bangud sa kakulang sang suplay sang dugo, gani importante ang aktibo nga pagpakigbahin sang komunidad.
Dugang pa niya, paagi sa blood donation, mahimo man mahibaluan sang donor ang iya blood type kag maeksamin ang iya panglawas agud masiguro kon kwalipikado siya nga magdonar.
Sa sini nga kaangtanan, gin-agda ni Konsehal Rodriguez ang publiko nga magpakigbahin sa Dugong Bombo 2026 nga may tema nga “A Little Pain, A Life to Gain” sa Nobyembre 14, 2026, halin alas-7 sang aga tubtob alas-5 sang hapon sa KCC Mall of Marbel Event Center, fourth floor.
Ginpabutyag sang konsehal nga ang isa ka boluntaryo nga donasyon mahimo mangin dako nga bulig sa pagluwas sang kabuhi sang isigkatawo.
