Nagpabutyag sang kalipay kag pagpasalamat ang isa ka minimum wage earner sa Koronadal City sa pagpatuman sang ₱41 nga dugang sa minimum wage sang mga mamumugon sa Region 12.
Sa interview sang Bombo Radyo Koronadal, ginpahayag ni Johana Ambuludto nga dako nga bulig ang nasambit nga wage increase sa ila nga mga mamumugon nga nagapaninguha nga masarangan ang nagasaka nga galastuhon sa adlaw-adlaw.
Ginpasalamatan man niya ang Department of Labor and Employment (DOLE) Region 12 kag ang national government sa paghatag sang igtalupangod sa kahimtangan sang mga minimum wage earners.
Suno kay Ambuludto, makatarunganon lamang nga may dugang sa ila sweldo bangud pareho man sa iban nga rehiyon sa pungsod, apektado man sila sang inflation kag padayon nga pagsaka sang presyo sang mga balaklon.
Ginpahayag niya nga mabudlay na ibalanse ang limitado nga sweldo sa nagadamo nga kinahanglanon, gani kinahanglan niya maghimo sang mga sakripisyo agud masiguro nga may bastante nga kwarta para sa iya kaugalingon kag pamilya.
Bisan pa nga indi masabat sang dugang nga sweldo ang tanan nga gastuhon, dako gihapon ini nga bulig sa ila adlaw-adlaw nga pangabuhi.
Gani, nagalaum si Ambuludto nga magapadayon ang paghatag sang suporta kag konsiderasyon sa mga mamumugon nga nagasalig lamang sa minimum wage.
