Bisan nagapadayon ang impeachment trial ni Vice President Sara Duterte, ginpasiguro ni House Deputy Speaker Janette Garin nga wala napasagdan sang Kongreso ang ila trabaho, ilabi na ang pagpreparar sang national budget kag mga tikang batok sa posible nga epekto sang Super El Niño.
Suno kay Garin, nagasunod sa iskedyul ang pagtalakay sa mga panukalang kasuguan, lakip ang national budget kag mga programa agud maatubang ang epekto sang posible nga malawig nga tig-ilinit.
Ginpaathag man niya nga indi ginhandum sang Kongreso ang impeachment proceedings, apang obligasyon nila nga aksyunan ang mga reklamo suno sa ginapatuman sang Konstitusyon. Gindugang niya nga indi dapat mag-untat ang iban nga buluhaton sang gobyerno bangud lamang sa nagapadayon nga paglilitis.
Samtang, nagpaandam ang PAGASA nga posible magpadayon ang mabaskog nga El Niño tubtob sa una nga bahin sang 2027, nga mahimo magresulta sa kakulang sang ulan, tagtuyot kag kakulang sang suplay sang tubig sa pila ka lugar.
Bangud sini, nagapreparar na ang gobyerno sang mga tikang agud masiguro ang suplay sang pagkaon kag tubig kag makahatag sang bulig sa mga mangunguma.
