Preparado na sa liwat nga maghatag sang 100 porsyento nga suporta ang Marbel School of Science and Technology, Inc. (MSST) sa pagpatigayon sang Dugong Bombo 2026 sa Sabado, Nobyembre 14, 2026.
Sa interview sang Bombo Radyo Koronadal kay Engr. Godofredo Guya, presidente sang MSST, liwat sini nga ginpasiguro ang bug-os nga suporta kag commitment sang ila institusyon sa amo nga bloodletting activity.
Ginpahayag man ni Guya ang importansya sang pagdonar sang dugo agod masiguro ang bastante nga suplay sini sa mga ospital kag blood bank, ilabi na para sa mga pasyente nga nagakinahanglan sang gilayon nga pagsasalin sang dugo.
Suno sa iya, ang kada donasyon mahimo makabulig sa pagluwas sang kabuhi.
Samtang, gindayaw man niya ang Bombo Radyo Philippines kag Bombo Radyo Koronadal sa padayon nga pagpatigayon sang mga programa nga nagahatag sang bulig kag serbisyo sa publiko.
Ginlaragway niya ang Dugong Bombo bilang isa ka dungganon nga adbokasiya nga nagahatag sang oportunidad sa publiko nga makabulig sa mga tawo nga nagakinahanglan.
Kaangot sini, nagpasalamat man si Engr. Guya sa Bombo Radyo Philippines sa padayon nga pagpalapnag sang mga programa nga nagapalig-on sang diwa sang pagbinuligay, pagpalangga kag pag-alagad sa isigkatawo.
Bangud sini, gin-imbitar ni Guya ang publiko nga magpakigbahin kag magsuporta sa Dugong Bombo 2026 paagi sa pagdonar sang dugo bilang pagpakita sang pagpalangga sa isigkatawo kag pagbulig sa pagluwas sang kabuhi sang mga Pilipino.
