Nagpabutyag sang bug-os nga suporta ang Korbel Foundation College, Inc. sa palaabuton nga Dugong Bombo 2026 nga ipatigayon sa Nobyembre 14, 2026, sa KCC Mall of Marbel, agud mapalig-on ang kampanya sa boluntaryo nga pagdonar sang dugo kag pagluwas sang kabuhi.
Sa interview sang Bombo Radyo Koronadal, ginpahayag ni Ms. Rona B. Tuballes, MBA, Administrative Supervisor sang Korbel Foundation College, Inc., ang ila pagsuporta sa amo nga aktibidad nga nagatuyo nga mabuligan ang mga pasyente nga nagakinahanglan sang dugo.
Suno sa iya, importante ang pagdonar sang dugo bangud daku ini nga bulig sa mga pasyente nga nagakinahanglan sang blood transfusion bangud sang emerhensya, operasyon, kag nagkalain-lain nga medikal nga kondisyon.
Kaangot sini, gin-awhag ni Tuballes ang publiko nga magpartisipar sa Dugong Bombo 2026 paagi sa boluntaryo nga pagdonar sang dugo, agud mangin kabahin sa pagluwas sang kabuhi kag paghatag sang paglaum sa mga pasyente kag ila pamilya.
Paagi sa ila suporta, ginapakita sang Korbel Foundation College, Inc. ang importansya sang pagbinuligay sang mga institusyon kag sang komunidad sa pagpalapnag sang importansya parte sa blood donation kag sa pagpasiguro nga may yara sang sapat nga suplay sang dugo para sa mga nagakinahanglan sini.
