Nagpanawagan ang Malacañang kay Senador Ronald “Bato” dela Rosa nga boluntaryo nga magsungka kag atubangon ang arrest warrant nga ginpaguwa sang International Criminal Court (ICC) agud malikawan ang posible nga bloodshed.
Suno kay Palace Press Officer Usec. Claire Castro, mas maayo kuntani nga magsungka na lang ang senador agud malikawan ang pag-ilig sang dugo sang anuman nga arrest operation.
Ginhingyo man sini ang mga grupo nga ginaalegar nagatago kay Dela Rosa nga indi sia pagbuligan sa paglikaw sa legal nga salabton.
Kasunod ini sang pahayag ni Interior Secretary Jonvic Remulla nga yara sa Mindanao si Dela Rosa, ginapahayag nga yara sa idalom sang proteksyon sang isa ka grupo nga sa karon nagapakig-istorya sa mga otoridad angut sa iya pagsungka.
Gin-athag ni Remulla nga ang anuman nga aksyon nga pagahimuon ang kinahanglan nga ma-handle sang maayo agud malikawan ang bayolente nga komprontasyon.
Ang mandamiento de aresto sang ICC batuk kay Dela Rosa ang may kaangtanan sa kampanya kontra iligal nga droga sa idalum sang administrasyon ni anay Presidente Rodrigo Duterte nga may kaangtanan sa kamatayon sang linibo ka mga tawo.
Sa karun si anay Presidente Duterte yara sa The Hague, Netherlands, samtang ginahulat ang hearing batok crimes against humanity.
