Patay ang indi magnubo sa 22 ka tawo kag 24 ang pilason matapos magbungguanay ang isa ka bus kag cargo truck sa highway sa Makueni County, Kenya.
Suno sa kapulisan, nagikan sa isa ka lubong ang mga pasahero sang bus sang natabo ang aksidente.
Kasamtangan man nga ginabulong na ang mga napilasan, apang suno kay County Commissioner Abdullahi Khalif, posible pa nga madugangan ang kadamuon sang mga napatay.
Wala pa mahibaluan ang eksakto nga kabangdanan sang aksidente, apang ginasusi sang mga awtoridad kun may kaangtanan diri ang sobra nga kadasig sang salakyan kag ang malain nga kondisyon sang dalan.
Ang highway nga nagadugtong sa Mombasa kag Nairobi ginakabig nga isa ka delikado nga bahin sang dalan. Tatlo ka semana antes sang pinakabag-o nga aksidente, 17 ka tawo man ang napatay sa isa pa ka pagbungguanay sa amo nga lugar.
