Nagpabutyag sang kabalaka ang pila ka fish kag meat vendor sa Koronadal Public Market bangod sa naganubo nga baligya, nga suno sa ila, may kaangtanan sa pagsira sang dalan kada hapon kag presensya sang mga talipapa sa downtown area.
Sa interview kay Manang Nene, isa sa mga vendor, ginpahayag niya nga daku na ang pagbag-o sang ila baligya kon ikumparar sa nagligad, antes nagdamo ang mga talipapa sa sentro sang siyudad.
Suno sa iya, madugay na nila nga ginapahayag ang ila kabalaka parte sa presensya sang mga talipapa, apang tubtob subong wala pa sila makakita sang nagakaigo nga aksyon.
Gani, ginpangabay ni Manang Nene sa Local Government Unit (LGU) sang Koronadal nga konsiderahon ang pagbalhin sang mga talipapa sa tagsa ka barangay agud indi na ini maglapit sa public market.
Paagi sini, ginapaabot niya nga madani liwat ang mga manugbakal nga magbakal sa sulod sang merkado kag mabuligan nga magbangon ang baligya sang mga vendor.
Gindugang niya nga nagalaum ang mga vendor nga mahatagan man sang kaangay nga pagtalupangod ang ila sitwasyon, subong sang mga tikang nga ginahimo sang lokal nga gobyerno sa pagdumala sang mga vendor sa higad sang dalan.
