Ginpahayag ni Koronadal City Mayor Erlinda “Bing” Pabi-Araquil nga iya ipasaka sa Market Supervisors Office ang mga isyu nga may kaangtanan sa pagnubo sang kadamuon sang mga manugbakal nga nagasulod sa Koronadal Public Market agud matalakay ang nagakaigo nga mga tikang sa pagsolbar sini.
Sa interview sang Bombo Radyo Koronadal, ginpahayag sang alkalde nga iya usisaon ang sitwasyon sa sulod sang merkado, lakip na ang mga kabalaka sang mga vendor parte sa nagagamay nga kustomer nga nagabakal sang ila mga balaklon.
Samtang, kaangtanan sa reklamo sang pila ka vendor nga ang malaba nga alagyan sa Alunan Avenue, nga yara sa atubangan sang public market, mahimo nga isa sa mga rason sang pagnubo sang kadamuon sang manugbakal, ginpahayag ni Mayor Pabi-Araquil nga may bahin man sang nasambit nga dalan nga ginbuksan na.
Apang, ginpasalig sang alkalde nga iya gihapon usisaon ang reklamo kag ang sitwasyon sa nasambit nga alagyan agud mahibaluan ang nagakaigo nga tikang sa mga isyu nga nakaapekto sa mga vendor sa merkado publiko.
