Ginpanawagan ni Solicitor General Darlene Marie Berberabe nga paathagon sang Korte Suprema ang epekto sang iya desisyon may kaangtanan sa national budget, ilabi na sa paggamit sang unprogrammed appropriations kag pagpagwa sang pondo sang gobyerno.
Suno kay Berberabe, indi pa pinal ang desisyon sang korte may kaangtanan sa budget ruling, gani may posibilidad pa nga magsumiter sang motion for reconsideration agud mapangayo ang dugang nga pagpaathag.
Ginpabutyag man niya nga ginapanugyanan sang Office of the Solicitor General ang ehekutibo kag ang Department of Budget and Management (DBM) nga indi anay gamiton ang unprogrammed appropriations sa idalom sang 2026 national budget samtang wala pa maklaro ang desisyon.
Partikular nga ginapatuhuyan ang Special Provisions 1-A kag 1-B, nga may kaangtanan sa mga kondisyon sa paggamit ukon pagpagwa sang standby funds sang gobyerno.
Samtang, ginklaro man ni Berberabe nga wala sang nakasaad sa desisyon sang Korte Suprema nga kinahanglan isauli ang mga nagamit na nga unprogrammed funds sang 2024 kag 2025.
Suno sa iya, mahimo iaplikar ang operative fact doctrine agud mapabilin ang bisa sang mga proyekto nga naimplementar na kag sang mga pondong nagasto na.
Ginalauman nga ang dugang nga pagpaathag sang korte makahatag sang klaridad sa pagpatuman sang 2026 budget kag makabulig nga malikawan ang posible nga paglapas sa Konstitusyon sa paggamit sang pondo sang gobyerno.
