Ginpahayag sang isa ka registered social worker ang panginahanglan nga mapabakod pa ang deployment sang social workers sa mga buluthuan sa syudad sang Koronadal kag probinsya sang South Cotabato.
Sa interview sang Bombo Radyo Koronadal ginpahayag ni John Ryan Huqueriza, nga importante ang presensya sang social workers sa mga buluthuan bangud may daku sila nga papel sa paghatag sang suporta, guidance kag intervention sa mga estudyante nga nagaatubang sang personal kag iban pa nga kabudlayan.
Suno sa iya, ang dugang nga social workers mahimo magpalapit sang social services sa mga kabataan kag makahatag sang mas madasig nga sabat sa ila mga panginahanglanon, ilabi na sa mga sitwasyon nga mahimo makaapekto sa ila mga desisyon kag kaayuhan.
Ginpahayag ni Huqueriza nga ginrespeto niya ang mga naga exister nga balaod kag parameters nga ginabasehan sang gobyerno sa pag-deploy sang mga social workers. Apang posible pa gihapon nga mapauswag ang mga programa agud masabat ang nagkalain-lain nga concern sa mga buluthuan.
Dugang pa niya, kinahanglan nga ang social services patas, inklusibo kag accessible agud ang mga kabataan kag iban pa nga nagakinahanglan sang bulig makabaton sang nagakaigo nga suporta.
