Nagapanawagan sang bulig ang pamilya nga nasunugan sang balay sa Barangay San Felipe, Tantangan, South Cotabato matapos ini bug-os nga ma-abo sang kalayo.
Sa interview sang Bombo Radyo Koronadal kay Fidel Alfonga, bayaw sang tag-iya sang balay, iya ginpahayag nga bangud hinimo lamang sa light materials ang ila puluy-an, madasig nga naglapta ang kalayo kag wala na ini nasalbar pa sang pag-abot sang mga bombero.
Suno kay Alfonga, wala gid sang bisan isa ka gamit nga nasalbar ang pamilya bangod sa kadasig sang paglapta sang kalayo.
Gani, nagapangayo sila sang bulig halin sa gobyerno, mga pribado nga organisasyon, kag mga indibidwal nga handa maghatag sang bulig sa ila sini nga tion.
Dugang pa niya, lakip sa nasunog ang P25,000 nga kwarta nga ginatuyo kuntani sang pamilya nga gamiton sa pagpakay-o ukon pag-renovate sang ila balay.
Apang antes pa ini nila magamit para sa pagpaayo sang puluy-an, natabo ang sunog kag nadala sa kalayo ang ila mga pagkabutang.
Bangud sa insidente, yara subong sa mabudlay nga kahimtangan ang pamilya nga wala na sang puluy-an kag mga kagamitan nga magamit sa ila adlaw-adlaw nga pagpangabuhi.
Sa sini nga tion, nagalaum ang pamilya nga may mga ahensya sang gobyerno, organisasyon, kag mga indibidwal nga makabulig sa ila agud makabangon halin sa kalamidad kag makapundar liwat sang ila puluy-an.
