Nagapabilin nga isa ka Tropical Depression ang Bagyong Maymay samtang nagapadayon ini sa paghulag padul-ong sa naaminhan-sidlangan sa kadagatan sa sidlangan sang Central Luzon, suno sa pinakahuli nga tropical cyclone bulletin sang PAGASA.
Ginpahayag sang weather bureau nga ang sentro sang bagyo katapusan nga nakita sa layong 290 kilometro sa sidlangan sang Casiguran, Aurora.
May bitbit ini nga pinakamabaskog nga hangin nga 45 kilometro kada oras malapit sa sentro kag pagbugso nga nagalab-ot sa 55 kilometro kada oras.
Samtang, wala na sang Tropical Cyclone Wind Signal nga ginapataas sa bisan diin nga bahin sang pungsod, apang padayon gihapon nga makaimpluwensya ang Bagyong Maymay kag ang ginpalig-on nga southwest monsoon ukon habagat.
Suno sa PAGASA, ang Typhoon Dolphin nga yara sa guwa sang Philippine Area of Responsibility (PAR) amo ang nagapalig-on sa habagat, nga magabitbit sang posible nga mabaskog nga pag-ulan sa pila ka lugar sa masunod nga mga adlaw.
Ginapaabot man sang PAGASA nga posible nga magluya kag mangin Low Pressure Area (LPA) ang Bagyong Maymay subong nga Biyernes sang aga.
Samtang, yara sa idalom sang orange rainfall warning ang pila ka lugar bangud sa posible nga 100 tubtob 200 milimetro nga ulan, lakip ang Zambales, Bataan, Tarlac, Pampanga, Bulacan, Metro Manila, Rizal, Cavite, Laguna, kag Batangas.
Halin Biyernes sang gab-i tubtob Sabado sang gab-i, Agosto 8, ginapaabot man ang amo man nga pagbaskog sang ulan sa Zambales, Bataan, kag Occidental Mindoro.
Samtang, nagapadayon man ang Gale Warning sa mga kadagatan nga sakop sang Batanes.
