Nagapati si House Prosecutor Rep. Lorenz Defensor nga ang wala pagsambit ni President Ferdinand Marcos Jr. sa impeachment trial ni Vice President Sara Duterte sa iya ikalimang State of the Nation Address nagapakita nga wala siya nagapanghilabot sa nagapadayon nga proseso.
Suno kay Defensor, igo na ang una nga pahayag sang presidente bilang sabat sa November 2024 Zoom press conference ni VP Sara diin naghimo ini sang pamahog may kaangtanan sa kabuhi sang presidente.
Ginpahayag niya nga indi na kinahanglan nga ipabutyag pa ni Marcos ang iya opinyon sa impeachment proceedings sa iya mga pampubliko nga pamulong agud malikawan nga madalahig sa pulitika ang kaso.
Suno sa House prosecution panel, indi importante kun suportado sang presidente ang pagpasaka sang kaso ukon indi, bangud desidido sila nga ipadayon ang pag-usisa kay VP Sara bangud sa nagpadayon nga impeachable offenses.
Ginlauman man ni Defensor nga matapos sa madali nga tion ang impeachment trial paagi sa klaro kag simple nga pagpresentar sang ebidensya kag mga testigo agud mahangpan sang publiko kag mga senator-judges.
Samtang,ginpahayag man niya nga dapat hatagan sang patas nga kahigayunan ang mga opisyal nga ginakaso may kaangtanan sa flood control scandal nga mapamatud-an ang ila kaugalingon, apang kun mapamatud-an nga may sala, dapat sila manabat sa ila nangin aksyon.
