Ginlaragway sang anay LandBank DepEd branch manager Nenita Camposano nga indi kasagaran ang ginpatuman nga cash withdrawal sang Department of Education (DepEd) nga nagabalor sang ₱37.5 milyon kada tseke sa ika-10 nga adlaw sang impeachment trial batok kay Vice President Sara Duterte.
Suno kay Camposano, “unusual” ang amo nga transaksyon para sa DepEd bangud sa iya panahon bilang branch manager, amo lamang ini ang pinakadako nga withdrawal sang ahensya nga iya nakita.
Ini ang iya sabat matapos pamangkuton ni Senator-judge Imee Marcos nahanungod sa pag-encash sang mga tseke nga nagabalor sang tig-₱37.5 milyon.
Ginpahayag ni Sen. Marcos ang daw nagakalain-lain ang mga pahayag ni Camposano, bangud sa iya nauna nga pagtestigo sa House of Representatives, ginsiling sini nga normal lang ang dagko nga withdrawal sang gobyerno kag pribado nga mga kliyente sa bangko.
Ginpaathag ni Camposano nga kun ang bug-os nga operasyon sang branch ang pagahambalan, normal lang ang dagko nga transaksyon bangud may iban pa nga ahensya sang gobyerno kag pribadong kompanya nga nagakuha sang dako nga kantidad sang kwarta.
Apang, gin-athag niya nga ang iya pagtawag nga “unusual” yara lang sa konteksto sang DepEd, bangud sa bug-os niya nga panahon sa amo nga branch, wala pa siya nakakita sang amo sina kadako nga cash withdrawal halin sa ahensya.
Suno pa kay Camposano, kasagaran nga ginakuha sang DepEd sa ila branch ang kantidad nga yara sa palibot sang ₱10 milyon, gani ang ₱37.5 milyon nga withdrawal halos apat ka beses nga mas dako kumpara sa ila naandan nga transaksyon.
