Ginpanindugan sang Second Division sang Sandiganbayan ang una sini nga desisyon nga ibasura ang mosyon ni Senador Jinggoy Estrada nga ipawalang-bisa ang kaso nga graft batok sa iya may kaangtanan sa ginapahayag nga kickback sa mga flood control project.
Ginbasura man sang korte ang iya mga mosyon nga pagpahunong sang pagpadayon sang hearing.
Suno sa resolusyon nga ginpangunahan ni Presiding Justice Geraldine Econg, wala nakahatag si Estrada sang bag-o nga ebidensya ukon legal nga basehan agud bag-uhon ang nauna nga desisyon.
Gindepensahan ni Estrada nga kulang ang criminal information bangud indi klaro ang iya papel sa kaso.
Apang suno sa korte, ini nga mga isyu dapat talakayon sa tion sang hearing kag indi rason agud ipasira ang kaso.
Suno sa prosekusyon, gin-alegar nga nakabaton sang kickback sanday Estrada kag anay Public Works Secretary Manuel Bonoan baylo sang paghatag sang pondo sang gobyerno para sa mga proyekto sa imprastraktura.
