Mag-atubangay ang Germany kag Paraguay para sa isa ka puwesto sa Round of 16 sang nagapadayon nga FIFA World Cup 2026 nga natalana alas-4:30 sang kaagahon, subong nga adlaw, oras sa Pilipinas.
Ang mapirde sa amo nga knockout match ang magapauli na sa ila tagsa ka pungsod, samtang ang madaog ang magapadayon sa Round of 16 kag may kahigayunan nga makasulod sa quarterfinals kun madaug man ang madason nga hampang.
Nakasulod ang Germany sa Round of 32 bisan napirde ini sang Ecuador, 2-1, sa ila katapusan nga hampang sa group stage, bangud sa maayo nga performance sang koponan sa nauna nila nga mga hampang.
Ginapaabot nga pangunahan ni Jamal Musiala kag Kai Havertz ang kampanya sang Germany batok sa Paraguay.
Sa pihak nga bahin, nakasulod man ang Paraguay sa knockout stage pinaagi sa mabakod sini nga depensa kag pisikal nga estilo sang hampang.
Sa ila katapusan nga assignment sa Group D, nagtapos sila sa 0-0 nga draw kontra Australia, nga nagtugot sa ila nga mag-abanse sa madason nga hugna.
