Matigdas nga ginpanginwala ni anay Senador Antonio “Sonny” Trillanes IV ang pahayag ni Davao Rep. Paolo “Pulong” Duterte nga may ginpagwa na nga arrest warrant ang International Criminal Court (ICC).
Suno kay Trillanes, wala pa sang ginpagwa nga warrant of arrest batok sa bisan sin-o, kag ang amo nga impormasyon isa lamang ka haka-haka.
Ginpahayag ni Pulong Duterte nga may yara siya suno pa sang “highly reliable source” nga nagasiling nga may yara na sang warrant batok sa pila ka personalidad, lakip na si Senador Christopher “Bong” Go.
Apang ginpanginwala ini dayon ni Trillanes kag sang mga ahensya sang gobyerno, lakip ang Department of the Interior and Local Government (DILG) kag Philippine National Police (PNP), nga nagpahayag nga wala sila nakabaton sang bisan ano nga opisyal nga komunikasyon halin sa ICC.
Base sa pinakabag-o nga report sang ICC, padayon pa gihapon ang imbestigasyon may kaangtanan sa war on drugs sang administrasyon ni anay Pangulong Rodrigo Duterte, apang wala pa sang ginpagwa nga arrest warrant.
Suno sa datos sang Human Rights Watch, ginabulubanta nga sobra 6,000 ka tawo ang gin-alegar nga napatay sa mga operasyon kontra droga halin 2016 tubtob 2022, rason nga nangin sentro sang imbestigasyon sang ICC ang Pilipinas.
Nagpabilin si Trillanes sa iya panindugan nga dapat ibase lamang sa opisyal nga datos kag komunikasyon halin sa ICC ang mga impormasyon agud malikawan ang paglapnag sang sala nga balita nga mahimo magdala sang kalibog sa publiko.
Dugang pa niya, ang bisan ano nga aksyon sang ICC kinahanglan mag-agi sa husto nga proseso kag indi dapat pag-unaon sang mga wala pa napamatud-an nga impormasyon.
