Lalong umiinit ang usapin sa balanse ng kapangyarihan sa Senado matapos ihayag ni Erwin Tulfo na may dalawa umanong senador na nais sumama sa bagong mayorya, ngunit nahaharap sa mga hadlang bago maisakatuparan ang kanilang paglipat.
Sa isang panayam, sinabi ni Tulfo na bukod kay Joel Villanueva, na nagpahayag ng pagdalo sa special session ngayong Hunyo 17, may dalawa pang mambabatas na nagpahiwatig ng interes na makibahagi sa grupong pinamumunuan ni acting Senate President at Senate President Pro Tempore na si Sherwin Gatchalian.
Gayunman, inakusahan ni Tulfo si Alan Peter Cayetano na umano’y pumipigil sa naturang hakbang, dahilan upang hindi agad makalipat ang mga nasabing senador sa bagong hanay ng mayorya.
Ayon pa kay Tulfo, isa sa mga ikinababahala ng dalawang senador ay ang posibleng pagharap sa matinding batikos at pag-atake mula sa mga online supporter ng kabilang kampo, kabilang ang mga vlogger at troll na maaaring maglunsad ng negatibong kampanya laban sa kanila.
Dahil dito, sinabi niyang maingat na pinag-aaralan ng mga naturang mambabatas ang kanilang magiging desisyon, lalo na kung paano maiiwasang madamay ang kanilang mga pamilya sa anumang posibleng backlash.
Inaasahang magiging sentro ng atensyon ang special session ngayong araw, kung saan maaaring mabigyang-linaw kung may mga senador nang pormal na lilipat sa panig ng bagong mayorya sa Senado.
