Narekord ang dako nga pagsaka sa external debt service burden sang Pilipinas sa una nga duha ka bulan sang 2026.
Suno sa Bangko Sentral ng Pilipinas (BSP), nagbayad ang nasyonal nga gobyerno kag pribado nga sektor sang kabug-usan nga $2.1 bilyon ukon ₱128.1 bilyon halin Enero tubtob Pebrero, nga mas mataas sang 31 porsyento ikumparar sa amo man nga tion sang nagligad nga tuig.
Nagakahulugan ini nga mas dako nga bahin sang kita sang pungsod ang nagakadto sa pagbayad utang.
Nagsaka sa 17.5 porsyento ang ginbayad sa utang bilang bahin sang kita sa export.
Buot silingon, masobra sa 17 sentimos sa tagsa ka dolyar nga kinita sa export ang ginbayad sa utang.
Ginduso ini sang halos 130 porsyento nga pagsaka sa pagbayad sang prinsipal nga nagdangat sa $884 milyon ukon ₱53.92 bilyon bangud sa mga nag-mature nga utang, samtang nagpabilin naman sa $1.2 bilyon ukon ₱73.2 bilyon ang ginbayad sa interes.
Samtang, ining mga datos sa umpisa sang tuig wala pa nagapakita sang mas malapad nga epekto sang nagalala nga inaway sa tunga sang US, Israel, kag Iran. Ining tensyon nagtuga sang hinali nga pagsaka sa presyo sang langis kag nagpasibod sa inflation, rason nga napilitan ang BSP nga hugton ang ila monetary policy.
Ang ginapaabot man nga pagpasaka sang interest rates sang US Federal Reserve naghatag sang dugang nga kabudlayan sa balor sang peso, nga sining karon lang naghuyang lapaw sa PHP 61 kontra sa $1.
