Opisyal na nga nangin ika-71 nga miyembro sang Coalition for Disaster Resilient Infrastructure ukon CDRI ang Pilipinas matapos magpakigkita si Pangulong Ferdinand Marcos Jr. sa mga opisyal sang grupo sa New Delhi, India.
Ang CDRI nagabulig sa mga pungsod nga mapalig-on ang mga imprastraktura batok sa kalamidad kag epekto sang climate change.
Bilang miyembro, makabenepisyo ang Pilipinas sa teknikal nga suporta, kaalam kag eksperyensya sang iban nga mga pungsod, lakip ang posibilidad sang pondo para sa disaster-resilient nga mga proyekto.
Ginlunsyar sang India ang CDRI sang 2019. Ang Pilipinas ang ikaduha nga pungsod sa Southeast Asia nga nagsulod sa coalition, kasunod sang Vietnam.
Suno kay PCO Acting Secretary Dave Gomez, importante ini para sa Pilipinas bangud padayon nga ginaatubang sang pungsod ang epekto sang nagalala nga climate change.
