Trauma kag kahadlok ang na eksperyensyahan sang isa ka OFW apisar yara sa 10 days ceasefire ang sa pungsod Lebanon.
Sa interview sang Bombo Radyo Koronadal kay Letecia Bartidu Cantilan – Bombo International News Correspondent to Lebanon, iya ginpakigbahin ang tuman ka trauma kag kahadlok nga iya na eksperyensyahan bangud sa kinagamo sa nasambit nga pungsod.
Suno kay Cantilan, masami siya ginakulbaan, nagataas ang iya blood pressure, kag nagakurog ang iya lawas nga amo ang rason nga siya naga handum nga makapuli na sa Pilipinas.
Yara sa tunga sang 10 ka adlaw nga ceasefire ang Lebanon nga nagahatag sang temporaryo nga katawhayan sa sitwasyon.
Apang, ginpahayag ni Cantilan nga indi niya malikawan ang kahadlok, kay may posibilidad nga maglala pa ang sitwasyon pagkatapos sang ceasefire.
Apisar sini, nagalaum sa gihapon si Cantillan nga magbalik na ang normal nga kahimtangan kag magtawhay na ang pungsod bangud bisan pa nga may ceasefire, padayon gihapon nga mabatian ang mga paglupok malapit sa ila lugar.
Gindugang ni Cantilan, nga madamo pa nga mga Overseas Filipino Workers (OFWs) ang naga-antos sang trauma kag kasubong nga kahadlok, kag kadam-an sa ila nagapangatubang sang problema sa kakulba kag kakulangan sang tulog bangud sa kahadlok nga maglala ang sitwasyon.
Sa karon nakapalapit na sila sa Philippine Embassy para magpangayo sang bulig kun sa diin may mga OFWs man nga nakapadalom na sa repatriation program sang gobyerno para masiguro nga makapauli sila sa Pilipinas sa pinakadali nga panahon kun magbukas na ang kahigayunan para sa repatriation.
