Nagpasiguro ang Department of Agriculture ukon DA nga may yara sang igo nga suplay sang bugas kag iban pa nga mga produkto nga pang-agrikultura tubtob matapos ang epekto sang ginatawag nga “Super El Niño.”
Suno kay DA spokesperson Assistant Secretary Arnel De Mesa, mahimo nga mag-abot sa 700,000 metric tons sang palay ang posible nga mawala sa produksyon sang pungsod bangud sa epekto sang El Niño, ilabi na ang matalom nga kainit kag kakulang sang ulan kag tubig sa mga uma.
Apang, ginpahayag ni De Mesa nga nagapadayon ang lokal nga produksyon sang bugas bilang bahin sang tikang sang gobyerno sa pagsiguro sang food supply. Padayon man ang National Food Authority ukon NFA sa pagbakal sang palay halin sa mga lokal nga mangunguma agud madugangan ang buffer stock sang pungsod.
Samtang, ginpabutyag sang opisyal nga kinahanglan pa dugangan ang cold-storage facilities sa pungsod.
Suno sa iya, makabulig ini sa pagpreserbar sang mga produkto nga pang-agrikultura kag pagpugong sang pagkadula ukon pagkadunot sang mga ani, ilabi na kon maapektuhan sang mabaskog nga init ang produksyon.
Nagapadayon naman ang DA sa pagmonitor sang produksyon kag suplay sang mga pagkaon agud mapabilin nga igo ang mga kinahanglanon sang publiko samtang ginatubang sang pungsod ang epekto sang El Niño.
