Ginlantaw sang mga analyst nga madula man ang tensyon kag mabalik sa normal ang relasyon sang South Korea kag Israel bisan nagluntad ang isyu bangod sa kontrobersyal nga social media post ni President Lee Jae Myung, nga ginbatyag sang Israel nga naga-insulto sa Jewish Holocaust.
Bisan sang insidente, ginpahayag sang mga eksperto nga indi ini dapat magresulta sa madalom nga paglala sang bilateral ties.
Ang post ni Lee, nga ginpaguwa sang Byernes, gina-alegar nga kabahin sang iya pagkomento sa nagadamo nga kabalaka sa kalibutan nahanungod sa gina-alegar nga paglapas sang Israel sa human rights kag international law samtang nagataas ang tensyon sa Middle East.
Nag-react dayon ang Ministry of Foreign Affairs sang Israel kag ginbatikos ang gin-repost nga video ni Lee—isa ka footage halin sang Septyembre 2024 nga nagaalegar sang malain nga pagtratar sang Israeli soldiers sa isa ka Palestinian nga kabataan.
Sa pihak nga bahin, ginpanindugan ni Lee nga may ara ini sang nagakaigo nga konteksto kag gin-athag niya ang rason sang iya pagbahin sang video.
Suno kay Shin Yul sang Myongji University, mahimo nga ipatawag sang duha ka pungsod ang ila mga ambassador kun maglala pa gid ang sitwasyon.
Apang para naman kay Min Jeong-hun sang Korea National Diplomatic Academy, indi angay ang pahayag sang presidente kag posible ini nga nakaapekto sa diplomatikong paghangpanay.
