Wala pa sang nabalitaan bahin sa repatriation ang pila ka mga OFWs sa Qatar.
Sa exclusive interview sang Bombo Radyo Koronadal kay Leizel Gullos, Bombo International News Correspondent sa Qatar, ginpahayag niya nga wala pa sila nakabati sang bisan ano nga plano ukon programa angot sa repatriation sang mga Pilipino nga nagatrabaho sa Qatar.
Apang suno sa iya, kun maglala pa ang sitwasyon sa rehiyon, may posibilidad nga mapilitan ang mga OFWs nga magpauli sa Pilipinas.
Samtang, ginpakigbahin man ni Gullos ang kabalaka kag kahadlok nga nabatyagan sang mga OFWs, labi na sa padayon nga paglala sang mga tensyon sa Middle East, kag ang pagbomba sang Iran sa mga critical nga lugar.
Bisan pa man sa mga pamahog sa seguridad, nagpabilin nga aktibo ang mga OFWs, lakip na ang mga health workers, nga nagapadayon sa ila mga trabaho.
Bangud sini, nagpanawagan si Gullos sa gobyerno sang Pilipinas nga maghatag sang mas dako nga suporta ilabi na sa pinansyal nga aspeto sa mga OFWs sa Qatar, bangud sa nagataas ang presyo sang mga baraklon kag ang epekto sang padayon nga kinagamo sa rehiyon.
