Nakabaton sang bug-os nga 100 percent passing rate ang Notre Dame of Marbel University sa Marso 2026 Medical Technologist Licensure Examination.
Sa interview sang Bombo Radyo Koronadal, ginpahayag ni Ryan Pedrigosa, RMT, Program Coordinator sang MedTech Department sang Notre Dame of Marbel University (NDMU), nga may 56 ka examinees halin sa buluthuan kag tanan ini nakapasar sa nasambit nga eksaminasyon.
Bangod sini, dako ang kalipay sang mga ginikanan, pamunuan sang eskwelahan kag labi na sang mga bag-o nga nakapasar nga medical technologists.
Suno kay Pedrigosa, ang nasambit nga kadalag-an isa ka pag-validate sang paningkamot kag pagpangabuglay sang mga estudyante sa ila preparasyon para sa board exam.
Dugang pa niya nga bisan madamo sang pagsulay nga ila naagyan lakip na ang pinansyal nga kabudlayan, kabahin gid ini sang preparasyon para sa amo nga eksaminasyon.
Ginpabutyag man ni Pedrigosa nga tatlo na ka sunod-sunod nga tuig nga nagalab-ot sa amo nga kadalag-an ang buluthuan.
Sa pihak nga bahin, ginpahinumdom man niya nga importante ang dedikasyon sa pagserbisyo sa healthcare system bangod dako gid ang kontribusyon sang mga medical technologist sa manpower sang sektor pangkalusugan.
