Wala pa madeterminar sang Malacañang ang maathag nga intensyon ukon motibo sa likod sang impeachment complaint nga ginpasaka batuk kay President Ferdinand Marcos Jr.
Suno kay Palace Press Officer Atty. Claire Castro, wala pa nila nakita ang opisyal nga kopya sang reklamo gani indi pa makahatag sang partikular kag detalyado nga sabat ang Palasyo sa amo nga bagay.
Ang impormasyon lamang nga yara sa Malacañang suno kay Castro amo nga ang party-list nga nag-endorso sang reklamo ang gina-alegar may kaangtanan sa isa sa mga kontraktor nga ginsambit sang Independent Commission for Infrastructure (ICI) sa flood control scam nga gina-imbestigaran.
Ginpasaka ang impeachment ni Atty. Andre de Jesus kag gin-endorso ni Pusong Pinoy Party-list Representative Jett Nisay, nga ginapahayag may koneksyon sa JVN Construction and Trading, isa sa mga kontraktor nga ginsambit sang ICI.
May-angot sini, nagapati si Presidente Marcos nga magagamit sang sound judgment ang mga mamalidha kag magsunod sa kasuguan sa paghinun-anon sang reklamo, kag indi pagtugutan nga magpangibabaw ang personal nga interes.
Ginpasalig man sang Palasyo nga nagapabilin nga nakatutok ang Presidente sa iya trabaho kag sa mga programa nga makapaayo sang pangabuhi sang mga Pilipino.
