Nagapabilin nga dako nga hangkat para sa City Government of Koronadal ang nagadamo nga basura sa sanitary landfill, ilabi na sa pagpangita sang bag-o nga lugar nga mangin alternatibo nga waste disposal area.
Ini ang ginpahayag ni Engr. Abril Ma. A. Lebanan, Supervising Environmental Management Specialist sang City Environment and Natural Resources Office (CENRO), sa interview sang Bombo Radyo Koronadal.
Suno kay Engr. Lebanan, kabahin sa mga ginakabalk-an sang lokal nga gobyerno ang pagpangita sang bag-o nga lugar para sa paghaboy sang basura.
Apang isa man ini ka dako nga hangkat bangud indi man maayo nga gamiton lamang ang mga duta bilang habuyanan sang nagadamo nga basura.
Bangud sini, nagapanawagan siya sa mga pumuluyo nga mangin responsable sa paghaboy kag pagdumala sang ila mga basura, lakip na ang husto nga segregation kag paghagan-hagan sang mga basura nga ginahaboy sa landfill.
Ginpahayag niya nga kinahanglan ang kooperasyon sang tanan agud mabuligan nga mapunggan ang padayon nga pagdamo sang basura kag mapabilin ang kalimpyo sang syudad.
