Nagakadapat nga e-deputize sang Mines and Geosciences Bureau Region XII (MGB-XII) ang Barangay kag ang LGU sang Tampakan agud nga may otoridad ukon gahum ang mga ini nga mag kumpiskar sang mga paraphernalia ukon mga equipments nga mga banlasero nga illegal nga nagapatigayon sang aktibidad sa banwa sang Tampakan, South Cotabato sa tion nga mag-operasyon na ang LGU.
Ini ang ginpahayag ni Kap. Neil Ryan Escobillo- Punong Barangay sang Brgy Pula Bato , Tampakan South Cotabato sa interview sang Bombo Radyo Koronadal.
Suno sa iya, isa ini sa mga tikang nga mangin epektibo sa batok sa mga banlasero bangud madulaan ang mga ini sang gamit sa ila nga illegal nga operasyon.
Dugang pa sini, nagakadapat man nga mabutangan sang field office sang Task Force Banlas sang MGB ang sang tatlo ka mga nakapalibot nga barangay sa Campo Kilot agud nga epektibo nga mabantayan sang mga ini ang illegal nga operasyon sa nasambit nga lugar.
Nagpaandam naman ini sa mga nagapatigayon sang illegal nga banlas sa ila nga nasakupan nga posible nga magapangatubang ang mga ini sang penalidad kun madakpan nga nagapatigayon sang illegal nga banlas labi na nga ini ang nakita nga rason sang mga otoridad kun ngaa nagakaguba ang alagyan sa nasambit nga lugar.
