Patay ang duha ka tawo kag may iban pa nga napilasan matapos ang pag-atake sang Estados Unidos sa Larak Island, Iran, nga malapit sa Strait of Hormuz.
Suno sa US Central Command, gin-target sang US ang duha ka Iranian rocket launchers nga ginapatihan nagapreparar sa paggamit sang mga rocket nga may dala nga sea mines sa Strait of Hormuz.
Suno sa US, ginpatuman ang pag-atake agud maproteheran ang mga commercial vessel nga nagalabay sa lugar.
Ginpahayag naman sang Iranian Revolutionary Guard Corps (IRGC) nga magapanimalos sila sa ginpatuman nga pag-atake sang Estados Unidos.
Bilang sabat, naglunsyar ang Iran sang mga missile padulong sa mga target sang US sa Jordan.
Suno sa Jordanian military, walo ka missile ang na-intercept, kag wala may ginreport nga napilasan sa mga base sang US.
Sa karon, nagapabilin nga mataas ang tensyon sa Strait of Hormuz kag pila ka bahin sang rehiyon.
