Nagpaalinton ang National Telecommunications Commission (NTC) Region 12 sa publiko nga maghalong sa pag-click ukon pagpindot sang mga makadududa nga links nga nagalapta sa mga cellphone kag iban pa nga gadgets, bangud mahimo ini mangin paagi sang mga scammers sa pagpangawat sang personal nga impormasyon.
Sa interview sang Bombo Radyo Koronadal kay Kate Ann R. Donguines, Admin Aide IV sang National Telecommunications Commission (NTC) Region 12, iya ginpahayag nga ginatun-an sang mga scammers ang ila target antes ini nila himuon nga biktima sang scam.
Suno sa iya, ginakilala anay sang mga scammer ang ila target, lakip na ang mga tawo nga masami sini kaistorya ukon ginakontak.
Mahimo ini gamiton sang mga scammer agud makahimo sang peke ukon makadududa nga mga mensahe kag links nga lehitimo kag kilala sang biktima.
Bangud sini, liwat nga nagpaalinton ang NTC Region 12 sa publiko nga indi basta-basta mag-click ukon magpindot sang mga links kag pages nga makadududa, ilabi na kun ini nagapangayo sang personal nga impormasyon, password, ukon iban pa nga sensitibo nga datos.
Ginaagda sang ahensya ang publiko nga mag-usisa anay sang ginhalinan sang link kag mensahe antes ini buksan agud malikawan ang pagkabiktima sang online scam.
